ദുഃഖം

നീ യമയാനത്തില്‍ കയറി
തെക്കേ ദിശ നോക്കിപ്പറന്നുപോയതിന്
ഞാന്‍ നിശ്ശബ്ദസാക്ഷിയാണ്.

ഓര്‍മയുണ്ടോ,
പണ്ട് അമ്മമ്മയുടെ ഫോട്ടോ.....
ഇപ്പോള്‍ ആരുമില്ല
ഓര്‍മ മാത്രം ബാക്കി.
കഴിഞ്ഞകാലം ഛായാചിത്രം
വരാനിരിക്കുന്നത് അവ്യക്തചിത്രം.
ഞാന്‍ വരുണദിശയില്‍ കണ്ണും നട്ടിരിക്കുന്നു.
സൂര്യാസ്തമയം കഴിഞ്ഞാല്‍
സൂ‍ര്യോദയത്തിനു കാവല്‍.

നീ യമപക്ഷം പിടിച്ചുപറന്ന അന്ന്
ഞാന്‍ സൂര്യനേത്രനായി,
ചുറ്റും ചുട്ടുപഴുത്തു,
നമുക്കിടയില്‍ ഹിമശീതമുരുകി.

നിളയില്‍
കാക്കകള്‍ ആര്‍ക്കോ ബലിയിടുന്നു.
നീ നീന്തിത്തുടിച്ചു കാട്ടിത്തന്ന
പേരാറിപ്പോഴില്ല.