ചൂടിക്കയര്‍ തെരഞ്ഞു നടക്കുന്ന ബിയ്യംകായല്‍

അവളും ഒരു പെണ്‍കുട്ടിയാണ്,
പറഞ്ഞാല്‍ കേള്‍ക്കുകയും കേള്‍ക്കാതിരിക്കുകയും
ചെയ്യുന്ന സാധാരണ പെണ്‍കുട്ടി.

നന്നരാവിലെ വട്ടപ്പൊട്ടും തൊട്ട് ചമഞ്ഞിറങ്ങും.
പകല്‍ പണിയെടുത്ത് പണിയെടുത്ത് നടുകടയും,
ടക....ടക....ടക....റാട്ടിന്റെ മീട്ടല്‍
മുപ്പിരി അഞ്ചുപിരി
തുമ്പികള്‍ കമ്പകള്‍ ചൂടികള്‍ പാറിപ്പറക്കുന്ന വാനമ്പാടികളുടെ പൂന്തോട്ടം.
നട്ടുച്ചക്ക് വെട്ടിത്തിളങ്ങുന്ന വെള്ളപ്പൊട്ട്,
നന്നവൈകുന്നേരം ചുവപ്പ് പിന്നെ മഞ്ഞ.
വല്ലപ്പോഴും കറുത്ത പൊട്ട്‌.
കുളി രണ്ടുനേരമാണ്, ഉറക്കം ഇല്ല.

ഈ പെണ്‍കുട്ടി പകലത്തെപ്പോലെയല്ല രാത്രിയില്‍
ഉന്മാദമാണ്‌.
ഇരുട്ടില്‍ നിലാവ് ചാലിച്ച്‌ മോന്തി വെളിവുകെടും
പിന്നെ നൃത്തം തന്നെ നൃത്തം,
ഇക്കിളിപ്പൂക്കളും ചന്ദ്രനും നക്ഷത്രങ്ങളും ഉറങ്ങാക്കിളികളുടെ പാട്ടും
ചകിരിത്തൊണ്ടുകളുടെ താളം പിടിക്കലും.
രാവിലെ
അവസാനത്തെ നക്ഷത്രവും ഉറങ്ങാന്‍ പോയതിനു ശേഷം
ഈ പെണ്‍കുട്ടി കുളിച്ചു ചുവപ്പ് പൊട്ടു തൊടും.

പകലും രാത്രിയും ചില ആണ്‍പൂക്കള്‍
മീന്‍വലചുണ്ടുതുറന്ന് മുലക്കണ്ണില്‍കൊളുത്തിവലിക്കും
അവള്‍ക്ക്‌ ചുരക്കുകയും ചെയ്യും.
ദേശാടനക്കിളികളും കൊറ്റികളും താറാവുകളും
മാറിലെ മണിമാലകളില്‍ കൊക്കുരുമ്മി കൊക്കുരുമ്മി -
ക്കാത്തുനില്‍ക്കും.

ഒക്കെപ്പണ്ടാണ് !

അവളിപ്പോള്‍ ചൂടിക്കയര്‍ തെരഞ്ഞുനടക്കുന്നത് എന്തിനാണ് ?
എന്തു പറഞ്ഞാലും കേള്‍ക്കുന്നവളായി മാറിയിട്ടും
മാവിന്റെ കൊമ്പുകള്‍ വെട്ടിക്കൂട്ടി അവളെ തീയിലിടാന്‍ നോക്കുന്നത് ആരാണ് ?